Velkomen til Kunstlåven
Praktisk informasjon
Opningstider
Kunstlåven er open kvar dag i juli kl. 11–17.
Billettar
Billettar kjøper du i resepsjonen når du kjem.
Billettprisar:
Barn og ungdom 0–18 år: gratis
Unge vaksne 18–25 år: 100 kr
Kunstnar: 100 kr
Vaksen: 150 kr
Medlem har gratis inngang for seg sjølve og ein ven. Du kan melde deg inn her.
Gjennom ordninga Kunstreise Seljord kan inngangsbilletten også nyttast same dag på Nutheim Kunstsenter og Eva Bull Holtes Museum.
Mat og drikke
I Kunstlåven har vi ein liten kafé med enkel servering. Her kan du nyte ein kopp kaffi og noko å bite i, anten inne i låven eller ute i finvêret.
Toalett
I første etasje har vi HC-toalett og stellebord.
Parkering
Det er god plass til parkering utanfor låven. Dersom parkeringa er full, er det mogleg å parkere ved skulen rett ved sida av.
Tilkomst og spesielle behov
Kunstlåven er ein gamal låve med ujamne golv, trapper og varierande takhøgd. Det er difor vanskeleg å universelt utforme bygget fullt ut.
Har du behov for tilrettelegging, brukar rullestol eller har vanskar med trapper, kan du gjerne ta kontakt med oss på førehand. Då prøver vi å finne ei god løysing saman.
Om nærområdet
Ynskjer du frisk luft før eller etter besøket, anbefaler vi ein tur innom Seljord Hage, som ligg rett ved Kunstlåven. Der kan du oppleve eit mangfald av blomar og planter i ein open felleshage.
Ynskjer du å leige lokaler i Kunstlåven?
Kunstlåven eignar seg godt til mange ulike arrangement – frå møte, kurs og mindre samlingar til selskap, konsertar og kulturarrangement.
Når du leiger Kunstlåven, leiger du alltid kaféområdet i første etasje. Dette kan nyttast åleine, eller kombinerast med eitt eller fleire av dei andre areala i bygget, alt etter behov og type arrangement.
Bygget har fleire rom med ulik storleik og karakter, og vi hjelper gjerne med å finne ei praktisk løysing som passar arrangementet ditt.
Ta kontakt for meir informasjon om moglegheiter, kapasitet og praktiske løysingar.
Kontakt: post@seljordkunst.no
Planteikningar for heile låven, utan mål. Trykk på biletet for å sjå det større.
-
Kaféen ligg i første etasje og er det faste utgangspunktet for all utleige i Kunstlåven. Her finn du eit hyggeleg fellesareal med kjøkken og to toalett. På teikning er dette heile 1. etasje frå galleriet og mot venstre.
Rommet har varmepumpe og kan nyttast året rundt. Kaféen eignar seg godt til møte, kurs, mindre selskap, pausar, servering og uformelle samlingar.
Kaféen kan leigast åleine, eller kombinerast med galleriet, Vognskjulet eller Loftsalen ved større arrangement.
-
Galleriet ligg vegg i vegg med kaféen i første etasje, og fungerer godt saman med kaféområdet. Begge romma har varmepumpe, noko som gjer dei godt eigna til bruk gjennom heile året.
Galleriet er eit avlangt rom med eit stort vindauge og ei lun stemning. Det passar godt til langbord, mindre selskap, møte, kurs, foredrag og presentasjonar.
Vi kan setje opp prosjektor etter behov.
-
Vognskjulet ligg i andre etasje og er eit romsleg areal med mykje karakter. Rommet er om lag dobbelt så stort som galleriet, og passar godt til større samlingar, selskap, foredrag og kurs.
Her er det plass til to langbord, eller til stolar sett opp for foredrag, samtalar eller mindre kulturarrangement.
Vognskjulet er per i dag best eigna i sommarhalvåret.
-
Loftsalen ligg i fjerde etasje og er det største rommet i Kunstlåven. Dette er eit stemningsfullt lokale med god plass og ei særleg ramme rundt større arrangement.
Rommet kan nyttast til konsertar, bryllaup, konfirmasjonar, selskap, foredrag og andre kulturarrangement. Ved konsertar og liknande arrangement kan Loftsalen romme opptil 100 stolar.
Per i dag er Loftsalen best eigna i sommarhalvåret, men rommet skal etter planen pussast opp, fullisolerast og få varmepumpe. Når dette arbeidet er ferdig, vil Loftsalen kunne nyttast gjennom heile året.
Loftsalen passar godt når de treng god plass og ønskjer eit lokale med særpreg.