Velkomen til Seljord Kunstforening!

Møt det engasjerte styret vårt:

Styreleiar: Ola Mo
Nestleiar: Knut Skrede Østevik
Styremedlemmar: Ane Victoria Linde, Ola Snippen og Dag Aanderaa

Vi er her for å inspirere og engasjere deg i kunstens verden. Utforsk våre utstillingar og arrangement, og ikkje nøl med å ta kontakt om du har spørsmål eller ønskjer å bli involvert.

Velkomne til vårt kunstfellesskap!

Velkommen som medlem

Kjære medlem i Seljord Kunstforeining,

Vi oppdaterer no medlemsregisteret vårt og tek i bruk StyreWeb, eit nytt system som blir nytta av kunstforeiningar over heile landet.
Målet er å få eit tryggare og enklare system for medlemskap, betaling og informasjon frå oss.

I samband med dette kan du i løpet av dei neste vekene få ein e-post frå StyreWeb på vegner av Seljord Kunstforeining.
Der vil du bli bedt om å bekrefte eller oppdatere kontaktinformasjonen din.

Alt du treng å gjere er å følgje lenkja i e-posten – det tek berre nokre minutt.
Dette er ein trygg prosess, og e-posten kjem frå ein offisiell avsendar (@styreweb.com).

Takk for at du er medlem og støttar arbeidet vårt!

Har du spørsmål kan du kontakte oss på post@seljordkunst.no.

Om du ikkje ønskjer å halde fram som medlem, kan du sende oss ein e-post.
Er du usikker på om du har betalt kontingent for 2025, er det òg berre å sende oss ein e-post, så sjekkar vi det for deg.

Sommarutstillinga 2026

Me er godt i gang med planlegging av sommarutstillinga for neste år! Meir informasjon kjem.

Våre samarbeidspartnarar gjer det mogleg for oss å arrangere sommarutstillingar på kunstlåven i Seljord. Uten denne støtta hadde ikkje vi kunna drive kunstlaget slik vi gjer i dag. Vi set stor pris på støtta.

Seljord Kunstforening
Skipa 1968

Seljord Kunstforening og Kunstlåven er ein unik visingsstad for samtidskunst. Kvart år skipar me til sommarutstilling der målet er å syne eit mangfald av kunstuttrykk og av høg kvalitet.

Me arbeider for å ta vare på og auke interessa for god kunst og godt kunsthandverk og vi freistar å fremje det beste i bygdekulturen gjennom utstillingar og programopplegg retta mot ulike publikumsgrupper, inkludert barn og unge.

Historikk

Seljord kunstforening (SKF) vart stifta i 1968. Formålet femna vidt. Foreininga skulle både skipe til utstillingar av samtidskunst og arbeide for å styrkje og ta vare på ulike uttrykk innan handverk, musikk, dikting, segn og soge. Kunstforeninga har soleis vore ein viktig kulturberar for litteratur, musikk, bildande kunst og lokal kultur gjennom alle år med mindre utstillingar og kulturtilstellingar.

Dei fyrste åra

Sigurd Telnes, rektor ved Seljord ungdomsskule, vart vald som fyrste leiar. Alle somrar frå 1968 og fram til 1990, vart ungdomsskulen omskapt til galleri for samtidskunst og utstillingsrom for bygdekunst og handverk. Sommarutstillinga var eit banebrytande grep for foreininga. For kulturlivet i Noreg var somrane på 1960-talet ei ferietid med få kulturtilbod. Utstillinga vart snart eit omgrep kjent av både kunstnarar og publikum langt utanfor Seljord. Gjennom året elles fekk ungdomsskuleelevane og – bygdefolket høve til å oppleve kunst av dei fremste kunstnarane i landet. Blant anna ved samarbeid med Riksutstillingane og Folkeakademiet.

Kunstsamlinga

Allereie frå skipingsåret i 1968 byrja arbeidet med å byggje opp ei fast kunstsamling. Samlinga tel i dag vel 550 nummer med måleri, grafikk og skulpturar; kjøpt inn frå kjende kunstnarar som har stilt ut hjå oss. Delar av samlinga er utlånt til kommunale bygg, så som skular og offentlege kontor.

Vi skipar også til utstillingar frå vår eiga samling med bestemte tema både i samband med kulturkveldar, men også til undervisningsbruk i ungdomsskulen. Alle seinare styre og leiarar av SKF har i stor grad arbeidd etter dei same retningslinene, men sjølvsagt med visse endringar over tid.

Kunstlåven

Kunstforeininga hadde gode vilkår i ungdomsskulebygget, men ønsket om eige bygg var sterkt. Då næraste nabo til ungdomsskulen, Seljord husmorskule, vart nedlagd, gjekk det berre eitt år før det vart skrive kontrakt mellom Telemark fylkeskommune og Seljord kunstforening om overtaking av driftsbygninga ved Seljord husmorskule.

Kunstforeininga overtok tidlegare driftsbygning på Seljord husmorskule og revitaliserte ho under namnet Kunstlåven, på 1990 talet. Romma har si opprinnelege form og har framleis same nemning, så som silo, hønsehus, grisehus, stall, høyrom osv. Kvart rom er unikt både i høve til utforming, storleik, lys og material. Det gir både utfordringar og moglegheiter, men ikkje minst – eit stort særpreg som kunstnarane finn spanande å arbeide med og i. Romma er avgrensa i høve til kvarandre, slik at kunstnarane får stor fridom og er ikkje avhengig av å rette seg etter kunstverket i naborommet.

Med støtte frå Norsk kulturråd, Telemark fylkeskommune, Seljord kommune, eigne midlar frå loppemarknad og sal av kunst og masse dugnadsarbeid makta kunstforeininga å oppgradere bygninga med toalett, kafé og kjøkken våren 2006.